Mubong Sugilanon: DUGO GIANOD SA ULAN

29 April 2017

“Happy Celebration sa kapistahan sa atong patron!” puno sa kalipay nga pagtimbaya sa kura paruko sa tanan human sa Santos nga Misa.

Usa lang ang pamilyang Sarmento sa mga deboto nga nagsaulog. Karon nga tuig ang espisyal alang sa magtiayong Canor ug Rosing kay nagkatigum ang tibuok pamilya. Dili mahubad sa mga pulong ang kalipay ug pasalamat sa inahang si Rosing nga nagsud-ong sa iyang mga anak ug mga apo. Pinasandig kini sa dughan sa iyang bana nga si Canor (mapahiyumon) ug namulong, “wala gyud naku damha nga makalingkawas ta sa atong kalisod ug mabuhi pa ug taas taas unya masud-ong ang kalipay sa atong mga anak nga may mga pamilya na usab.” “Dili kita pasagdan sa Labawng Makagagahum Rosing,” tubag ni Canor.

Tood man sadya nga miabi-abi sa mga bisita si Junjun nga nagkugos sa anak niining babae, 27 anyos ug ang ika-tulong anak sa magtiayong Sarmento. Ug tungod kay nakapostura man, gikantyawan kini sa magulang nga si Rudy. Mitubag lang ang manghod ug katawa.

Hangtud sa tibuok adlaw, sulod-gawas ang mga bisita sa panimalay Sarmento.

“Kanindot bag ingon ini ta matag adlaw no? Kanang walay bug-at nga mga suliran, walay mga bug-at nga balatian, walay away ug walay pasakitay sa usag-usa,” litok ni Nay Rosing samtang ang tanan naa sa tunga-tunga sa panihapon.

“Sige ra ma kay mga buutan naman ning imong mga anak ug umagad, ambot lang kaha ning imong mga apo,” tubag ni Rudy nga pinakatawa ug nahugyaw ang tibuok banay sa maong komedya.

Samtang naa sa sala nga naghagwa sa iyang duha ka anak si Junjun may nabati kini nga tawag gikan sa gawas. “Gaw Junjun, tana! Adto na ta sa discohan gaw. Tan-aw ra gud ta didto. Uli ra ta dayon,” singgit ni Abel nga anak sa iyaan ni Junjun. Gipadayon usa kadali ni Tay Canor si Abel.

Human sa panihapon ug dyutayng inom ug beer, andam na ang mag-ig-agaw sa pag-adto sa kalingawan sa sentrong bahin sa ilang barangay.

Samtang pa gawas na sa gate ang duha ka lalaki, may nabati silang singgit nagpanawag, “Junjun! Junior! Hulat usa! Hulat usa mo!” Ang inahan diay niini.

“Unsa man ma? Hinay lang kay madagma ka,” tubag ni Junjun.

Hugot nga gigakos ni Nay Rosing si Junjun ug mipahinumdom sa anak, “Sakto na tong inyong nainom diri ha. Dili na magpagabii kaayo. Sayod na baya mo sa kadilikado sa panahon karon.”

“Ayawg kabalaka Ma, buutan na ning imong anak. Ug too man pud ko sa giingon sa kapulisan ug sa atong bag-ong goberno nga walay angay kabalak-an ang mga mibalik ug dangop sa sabakan sa balaod ug boluntaryong magtul-id sa kaugalingon,” pinahapuhap sa abaga sa inahang tubag sa anak. “Ug isa pa Ma, wala nay mag-interes naku oy, unsa ra gud ta tawon. Kung naa silay interesan kadtong mga dagkung isda,” dugang sa anak.

Ug didto sa kalingawan, lingaw nga nakighimamat sa mga higala ug kaila silang Abel ug Junjun. Matngon sa tugon sa inahan, wala na midawat pa ug tagay si Junjun samtang si Abel walay gibalibarang tunol.

Kaadlawon na sa dihang mipugos na si Junjun ug hagad kang Abel sa pagpanguli. Ug tungod kay labihan mang hubuga, kinahanglang agakon ni Junjun si Abel. Bisan pa sa katin-aw sa panghuna-huna ni Junjun, madaug gyud kini sa kabug-aton sa ig-agaw ug dili malikayang mosarasay ug matumba ang duha.

“Parts! Paspas na ug sibat kay may mga dili maayong talimad-on sa palibot. Murag naay gipangita,” kalit nga singgit ni Beto nga naka-motorsiklong milabay sa nahimutangan sa mag-ig-agaw.

“Dili naku pwede biyaan ning akong ig-agaw parts,” singgit usab ni Junjun nga gipahilunang makalingkod sa daplin sa dalan an gig-agaw.

Paspas nga nawala sa panan-aw ni Junjun ang higala nga daw gikaon sa kangitngit sa dalan. Ug giagbayan na usab ni Junjun ang ig-agaw aron sa pagpadayon paglakaw. “Gamay na lang gaw, abot na ta. Makapahulay na ka ug tarong,” paghinabi ni Junjun sa ig-agaw nga hubog.

Kalit nga nagkagubot ug nagpanginggit ang mga balay daplin sa dalan ug human sa usa ka boto.

“Didto sa unahan, pastilan… malooy mo, maloy mo! Naay tawo gipusil. Dalia ninyo intawon! Malooy mo! Tabanga ninyo!” singgit sa usa ka babaye nga naghilak samtang nagdagan ug nangayog pakitabang.

Si Junjun, suot ang bisti niadtong buntag sa kapistahan, nagkulob sa daplin sa dalan ug ang dugo gianod sa ulan. – KATAPUSAN -

---------------------- 

Ang sugilanon bunga lang sa huna-huna sa nagsulat. Kung may mga pangalan, lugar, kasinatian o istorya nga susama niini, kana wala tuyua.

Dugo nga Gianod sa Ulan, usa lang sa mga mubong sugilanon nga resulta sa gipahigayong Youth Summer Arts Camp ilalum sa Literary Class niadtong April 28 – May 2, 2017 sa Mimbalot, Buruun, Iligan City nga gipasiugdahan sa Alyansa ng Kabataang Mindanao para sa Kapayapaan, Mindanao Tri-People Youth Center ug Yapak Artists’ Network.